Pawan Kalyan: పవన్‌తో జేడీ భేటీ.. నేడు జనసేనలోకి!

హైలైట్స్

  • పవన్ కల్యాణ్‌తో సీబీఐ మాజీ జేడీ లక్ష్మీనారాయణ భేటీ.
  • జేడీ జనసేనలో చేరతారంటూ మొదలైన ప్రచారం.
  • శ్రీకాకుళం లేదా విశాఖ నుంచి ఎంపీగా పోటీ
స్వచ్చంద పదవీ విరమణ చేసిన సీబీఐ మాజీ జేడీ వి.లక్ష్మీనారాయణ రాజకీయాల్లో వస్తున్నట్టు ప్రకటించినా ఇంతవరకు ఏ పార్టీలోనూ చేరలేదు. కొత్త పార్టీ పెడతారని ప్రచారం సాగింది. ఒక దశలో లోక్‌సత్తాలో చేరి ఆ పార్టీ పగ్గాలను స్వీకరిస్తారని వార్తలు కూడా వచ్చాయి. ఇక, నాలుగు రోజుల కిందట టీడీపీలో చేరి భీమిలి నుంచి అసెంబ్లీకి పోటీ చేస్తారని ప్రచారం సాగినా ఆయన వెనక్కు తగ్గినట్టు తెలుస్తోంది. లక్ష్మీనారాయణ టీడీపీలో చేరతారంటూ వార్తలు రావడంతో వైసీపీ ఆయనపై విమర్శలు గుప్పించింది. చంద్రబాబు, లక్ష్మీనారాయణ మధ్య రహస్య సంబంధాలున్నాయని, వీరిద్దరిపై విచారణ జరిపించాలని డిమాండ్ చేశారు. సీబీఐ జేడీగా ఉన్నప్పుడు లక్ష్మీనారాయణ టీడీపీ డైరెక్షన్‌లోనే పనిచేశారని ఆరోపించారు. దీంతో వెనక్కు తగ్గిన మీడియా ముందు ప్రకటన చేశారు.

ఈసారి నేను ఎన్నికల బరిలోకి దిగడం లేదని, ప్రస్తుతం ఏ పార్టీలోనూ చేరడం లేదని జేడీ రెండు రోజుల కిందట ప్రకటించారు. తాజాగా, శనివారం రాత్రి విజయవాడలో పవన్ కల్యాణ్‌ను జేడీ లక్ష్మీనారాయణ కలుసుకున్నారు. జనసేన పార్టీ కార్యాలయానికి వచ్చిన ఆయనను పవన్ సాదరంగా ఆహ్వానించారు. అనంతరం వారిద్దరూ భేటీ అయ్యారు. ఇద్దరి మధ్యా ఏ అంశాలపై చర్చ జరిగిందనేది ఆసక్తికరంగా మారింది. ఆదివారం ఉదయం 10.30 గంటలకు జేడీ లక్ష్మీనారాయణ జనసేనలో చేరనున్నారు. లక్ష్మీనారాయణతో పాటు ఎస్‌కేయూ మాజీ వీసీ శ్రీరాజగోపాల్‌ కూడా జనసేనలో చేరనున్నారు. విశాఖ లేదా శ్రీకాకుళం పార్లమెంటు స్థానం నుంచి పోటీకి దిగుతారనే ప్రచారం సాగుతోంది.