JD Lakshminarayana: జనసేనలో చేరిన జేడీ.. రాయలసీమ నుంచి ఎంపీగా బరిలోకి!

హైలైట్స్

  • పవన్ కల్యాణ్ పార్టీలో చేరిన మాజీ జేడీ లక్ష్మీనారాయణ.
  • పవన్ మార్గదర్శకత్వంలో ప్రజల కోసం పనిచేస్తానంటూ వ్యాఖ్యలు.
  • ధైర్యం, జ్ఞానం, జనాదరణ ఉన్న నేత పవన్ అంటూ ప్రశంసలు.
సీబీఐ మాజీ జాయింట్ డైరెక్టర్ లక్ష్మీనారాయణ ఆదివారం జనసేనలో చేరారు. ఆయనకు కండువ కప్పి పవన్ కల్యాణ్ పార్టీలోకి సాదరంగా ఆహ్వానించారు. ఈ సందర్భంగా లక్ష్మీనారాయణ మాట్లాడుతూ.. భారీగా డబ్బులు ఖర్చుపెట్టకుండా ఎన్నికల్లో గెలవలేమన్న అభిప్రాయం ప్రస్తుతం నెలకొని ఉందని, అయితే, సొమ్ములతో పనిలేకుండానే రాజకీయం చేయొచ్చని నిరూపించే అవకాశం వచ్చిందని వ్యాఖ్యానించారు. ఓ ప్రొఫెసర్‌లో జ్ఞానం ఉంటుంది.. మరికొందరిలో ఆత్మ విశ్వాసం ఉంటుంది.. ఇంకొందరికి జనాదరణ ఉంటుంది.. ఈ మూడు లక్షణాలను పుణికిపుచ్చుకున్న వ్యక్తి పవన్ కల్యాణ్ అని జేడీ ప్రశంసలు కురిపించారు. సినిమా రంగంలో దండిగా డబ్బు సంపాదించుకునే అవకాశం ఉన్నా ప్రజాసేవకు దాన్ని పవన్ వదులుకున్నారని వ్యాఖ్యానించారు. పవన్ మార్గదర్శకత్వంలో ముందుకు వెళుతూ ప్రజల ఆశలు, ఆకాంక్షలను నెరవేరుస్తామని, మాటల్లో కాదు చేతల్లో చేసి చూపిస్తామని ఆయన స్పష్టం చేశారు.

ప్రజల కోసం, ప్రజాసేవలో పనిచేస్తున్న పవన్‌ పార్టీలో చేరడం ఎంతో సంతోషంగా ఉందని, జనసైనికుల్లో తాను కూడా ఒకడిగా మారిపోయానని పేర్కొన్నారు. ‘మనం ముందుకెళ్దాం.. దేశాన్ని మారుద్దాం.. జనసేన అంటే ఎంటో చూపిద్దాం’ అంటూ లక్ష్మీనారాయణ నినదించారు. ఇక, స్వచ్చంద పదవీ విరమణ తర్వాత ఏ పార్టీలో చేరాలన్న సందిగ్దంలో ఉన్న మాజీ జేడీ లక్ష్మీనారాయణ చివరకు జనసేనలో చేరారు. జేడీ ఎక్కడ నుంచి పోటీచేస్తారనే విషయంపై ఇంకా నిర్ణయం తీసుకోనట్టు తెలుస్తోంది.

రాబోయే ఎన్నికల్లో లక్ష్మీనారాయణ ఎంపీగా పోటీచేయాలని తాను భావిస్తున్నట్లు పవన్ వెల్లడించారు. రాయలసీమ నుంచి ఆయన పోటీచేస్తే బాగుంటుందని తన మనసులోని మాటను బయటపెట్టారు. వామపక్షాలతో పాటు బహుజన్ సమాజ్ పార్టీ(బీఎస్పీ)తో పొత్తు కుదిరిన విషయాన్ని ప్రస్తావించిన పవన్, వారితో చర్చలు జరపనున్నట్లు తెలిపారు. చర్చల అనంతరం సాయంత్రం 5 గంటలలోపు జేడీ లక్ష్మీనారాయణకు కేటాయించే టికెట్ పై స్పష్టమైన ప్రకటన చేస్తామని పవన్ పేర్కొన్నారు.