ಚೌಕಿದಾರ್ ನರೇಂದ್ರ ಮೋದಿ: ಟ್ವಿಟರ್ ಖಾತೆ ಹೆಸರು ಬದಲಿಸಿದ ಪ್ರಧಾನಿ

Highlights

  • ಟ್ವಿಟರ್ ಖಾತೆ ಹೆಸರನ್ನು ‘ಚೌಕಿದಾರ್ ನರೇಂದ್ರ ಮೋದಿ’ ಎಂದು ಬದಲಾಯಿಸಿಕೊಂಡ ಪ್ರಧಾನಿ
  • ಪ್ರಧಾನಿ ಅನುಸರಿಸಿದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಮತ್ತು ಇತರ ನಾಯಕರು
  • ಮೈ ಭಿ ಚೌಕಿದಾರ್ ಅಭಿಯಾನದ ಬೆನ್ನಲ್ಲೇ ಟ್ವಿಟರ್ ಹೆಸರು ಬದಲಾವಣೆ ಪರ್ವ
  • ಕಾಂಗ್ರೆಸ್‌ಗೆ ತಿರುಗುಬಾಣ ನೀಡಿದ ಪ್ರಧಾನಿ

ಹೊಸದಿಲ್ಲಿ: ಕಾಂಗ್ರೆಸ್ ತಮಗೆ ಚೌಕಿದಾರ್ ಎಂದು ಜರಿದಿದ್ದುದನ್ನೇ ತಿರುಗು ಬಾಣವಾಗಿ ಉಪಯೋಗಿಸಿದ್ದ ಮೋದಿ, ಮೈ ಭೀ ಚೌಕಿದಾರ್ ಅಭಿಯಾನದ ಯಶಸ್ಸಿನ ಬಳಿಕ ತಮ್ಮ ಟ್ವಿಟರ್ ಖಾತೆ ಹೆಸರನ್ನು ಸಹ ‘ಚೌಕಿದಾರ್ ನರೇಂದ್ರ ಮೋದಿ‘ ಎಂದು ಬದಲಾಯಿಸಿಕೊಂಡಿದ್ದಾರೆ.

ಪ್ರಧಾನಿಯನ್ನೇ ಅನುಸರಿಸಿರುವ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ತಾವು ಕೂಡ ಚೌಕಿದಾರ್ ಅಮಿತ್ ಶಾ ಎಂದು ಬದಲಾಯಿಸಿಕೊಂಡಿದ್ದಾರೆ.

ತಮ್ಮ ಪಕ್ಷದ ವರಿಷ್ಠ ನಾಯಕರು ಈ ಬದಲಾವಣೆ ಮಾಡಿಕೊಂಡ ಬಳಿಕ ಪಿಯೂಷ್ ಗೋಯಲ್, ಜೆ ಪಿ ನಡ್ಡಾ, ಮೀನಾಕ್ಷಿ ಲೇಖಿ, ರವಿಶಂಕರ್ ಪ್ರಸಾದ್ ಸೇರಿದಂತೆ ಪಕ್ಷದ ಅನೇಕ ನಾಯಕರು ಸಹ ತಮ್ಮ ಟ್ವಿಟರ್ ಖಾತೆ ಹೆಸರಿಗೆ ಚೌಕಿದಾರ್ ಎಂದು ಸೇರಿಸಿಕೊಂಡಿದ್ದಾರೆ.

ನಿಮ್ಮ ಕಾವಲುಗಾರ ದೃಢವಾಗಿ ನಿಂತಿದ್ದಾನೆ ಮತ್ತು ದೇಶದ ಸೇವೆ ಮಾಡುತ್ತಿದ್ದಾನೆ ಎಂಬ ಟ್ವೀಟ್ ಮೂಲಕ ಪ್ರಧಾನಿ ಮೋದಿ ಮೈ ಭಿ ಚೌಕಿದಾರ್ ಅಭಿಯಾನ ಆರಂಭಿಸಿದ ಒಂದು ದಿನದ ಬಳಿಕ ಟ್ವಿಟರ್ ಖಾತೆ ಹೆಸರು ಬದಲಾವಣೆ ಪರ್ವ ಆರಂಭವಾಗಿದೆ.

ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಅವರು ರಫೇಲ್ ಒಪ್ಪಂದಕ್ಕೆ ಸಂಬಂಧಿಸಿದಂತೆ ಚೋಕಿದಾರ್ ಚೋರ್ ಹೈ ( ಕಾವಲುಗಾರನೇ ಕಳ್ಳ) ಎಂದು ಮೋದಿ ಅವರನ್ನು ಟೀಕಿಸಿದ್ದರು. ಇದಕ್ಕೆ ತಿರುಗುಬಾಣವಾಗಿ ಪ್ರಧಾನಿ ಈ ಅಭಿಯಾನವನ್ನು ಆರಂಭಿಸಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತದೆ.

ಶನಿವಾರ ಮುಂಜಾನೆ ಪ್ರಧಾನಿ ಮೋದಿ, ನಿಮ್ಮ ಕಾವಲುಗಾರ ದೃಢವಾಗಿ ನಿಂತು ದೇಶ ಸೇವೆಯಲ್ಲಿ ತೊಡಗಿದ್ದಾನೆ. ನಾನೊಬ್ಬನೇ ದೇಶ ಸೇವೆ ಮಾಡುತ್ತಿಲ್ಲ. ಯಾರೆಲ್ಲ ದೇಶಸೇವೆಯಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೋ ಅವರೆಲ್ಲ ಕಾವಲುಗಾರರೇ. ಭ್ರಷ್ಟಾಚಾರ, ದುಷ್ಟತನ, ಸಮಾಜ ವಿರೋಧಿ ಕೆಲಸಗಳ ವಿರುದ್ಧ ಹೋರಾಡುವವರೆಲ್ಲ ಚೌಕಿದಾರರೇ. ಭಾರತದ ಪ್ರಗತಿಗಾಗಿ ಪರಿಶ್ರಮದಿಂದ ಶ್ರಮಿಸುವವರೆಲ್ಲ ಚೌಕಿದಾರರೇ. ಇಂದು, ಪ್ರತಿಯೊಬ್ಬ ಭಾರತೀಯ ಹೇಳುತ್ತಿದ್ದಾನೆ
#MainBhiChowkidar ಎಂದು ಟ್ವೀಟ್ ಮಾಡಿದ್ದರು. ಇದರ ಜತೆಗೆ, ಮೂರು ನಿಮಿಷಗಳ ಒಂದು ವಿಡಿಯೊವನ್ನು ಕೂಡಾ ಪೋಸ್ಟ್‌ ಮಾಡಲಾಗಿದ್ದು, ಅದರಲ್ಲಿ, ಭಾರತೀಯ ನಾಗರಿಕರು ತಾವು ತಮ್ಮ ಸ್ವಂತ ಮನೆಗಳ ಹೆಮ್ಮೆಯ ಚೌಕಿದಾರರೆಂದು ಹೇಳಿಕೊಳ್ಳುತ್ತಿರುವುದನ್ನು ತೋರಿಸಲಾಗಿದೆ. ಹೀಗೆ ಪ್ರತಿಯೊಬ್ಬರೂ ಅಂತಿಮವಾಗಿ ದೇಶದ ಕಾವಲುಗಾರರು ಎಂದು ಬಿಂಬಿಸಲಾಗಿದೆ.

ಅಷ್ಟೇ ಅಲ್ಲ, ತಮ್ಮ ಈ ಅಭಿಯಾನಕ್ಕೆ ಬೆಂಬಲ ನೀಡಿ. ಬೆಂಬಲಿಗರು ಕೇವಲ ಮನಸ್ಸಿನಲ್ಲಿ ಅಲ್ಲ, ಮೌಖಿಕವಾಗಿ ‘ನಾನೂ ಚೌಕಿದಾರ’ ಎಂಬ ಪ್ರತಿಜ್ಞೆ ಸ್ವೀಕರಿಸಬೇಕು ಎಂದು ಟ್ವಿಟರ್ ವಿನಂತಿ ಮಾಡಲಾಗಿತ್ತು. ಈ ನಡುವೆ ಬಿಜೆಪಿಯ ಸಾಮಾಜಿಕ ಜಾಲ ತಾಣ ವಿಭಾಗ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, ಪ್ರತಿಜ್ಞೆ ಸ್ವೀಕರಿಸಿದ ವೀಡಿಯೋ ಪೋಸ್ಟ್‌ ಮಾಡುವ ಪ್ರತಿಯೊಬ್ಬರಿಗೂ ಪ್ರಧಾನಿ ಮೋದಿ ಅವರ ವೈಯಕ್ತಿಕ ಸಂದೇಶ ರವಾನೆಯಾಗುವಂತೆ ಟ್ವಿಟರ್‌ನ ಆಯ್ಕೆಯನ್ನು ಬಳಸಿಕೊಂಡಿತ್ತು.

‘ಚೌಕಿದಾರ್‌ ಚೋರ್‌ ಹೈ’ ಎಂಬ ಕಾಂಗ್ರೆಸ್‌ ಸ್ಲೋಗನ್‌ಗೆ ತಿರುಗೇಟು ನೀಡಲು ರೂಪಿಸಿರುವ ಈ ತಂತ್ರ ಒಂದೇ ದಿನದಲ್ಲಿ ಫಲ ನೀಡಿದ್ದು, ದೇಶ ಮಾತ್ರ, ವಿದೇಶದಲ್ಲೂ ಇದು ಟ್ರೆಂಡ್‌ ಸೃಷ್ಟಿಸಿದೆ. ಈ ಹ್ಯಾಷ್‌ಟ್ಯಾಗ್ ಜಾಗತಿಕ ಮಟ್ಟದಲ್ಲಿ ಟ್ವಿಟರ್‌ನ ಮೊದಲ ಟ್ರೆಂಡ್ ಆಗಿದೆ.