'పశ్చిమ' పోరు 'పవర్'ఫుల్.. టఫ్ ఫైట్ తప్పదేమో!

పుణ్య గోదావరి స్పర్శతో పునీతమైన పశ్చిమగోదావరి జిల్లా పాడి పంటలతో రాష్ట్ర వ్యవసాయ రంగానికే తలమానికంగా నిలుస్తోంది. చరిత్ర పరంగానూ ఎంతో ప్రాముఖ్యత కలిగిన ఈ జిల్లా వాసి అడుగుపెట్టని రంగం లేదంటే అతిశయోక్తి కాదేమో. విద్య, వైద్య, వ్యవసాయం, ఆధ్యాత్మికం, పర్యాటక రంగాల్లో మేటిగా నిలుస్తోంది ఈ జిల్లా. రాజకీయంగా ఎంతో చైతన్యం కలిగిన పశ్చిమగోదావరి జిల్లా రాష్ట్ర రాజకీయాల్లో కీలక పాత్ర పోషిస్తోంది.

అసెంబ్లీ నియోజకవర్గాలు(15)
ఆచంట, ఉంగటూరు, ఉండి, ఏలూరు, కొవ్వూరు, గోపాలపురం, చింతలపూడి, తణుకు, తాడేపల్లి, దెందులూరు, నర్సాపురం, నిడదవోలు, పాలకొల్లు, భీమవరం, పోలవరం

పార్లమెంట్ నియోజకవర్గాలు(2)
ఏలూరు, నర్సాపురం

2014 ఎన్నికల్లో టీడీపీకి కంచుకోటగా నిలిచిన పశ్చిమగోదావరి ఆ పార్టీ అధికారంలోకి రావడంలో కీలకపాత్ర పోషించింది. జిల్లాలోని 15 అసెంబ్లీ నియోజకవర్గాల్లో టీడీపీ 14 గెలుచుకోగా, మిత్రపక్షం బీజేపీ తాడేపల్లిగూడెం అసెంబ్లీ సీటుతో పాటు నర్సాపురం ఎంపీ స్థానాన్ని దక్కించుకుంది. వైసీపీ డకౌట్(0) అయింది. రైతు రుణమాఫీ, డ్వాక్రా రుణమాఫీ వంటి హామీలు ప్రజల్లోకి బలంగా వెళ్లడంతో టీడీపీ నేతలు సైతం ఊహించని గెలుపును కట్టబెట్టారు పశ్చిమ ప్రజలు. అధికారం తిరిగి నిలబెట్టుకోవాలని చూస్తున్న టీడీపీ జిల్లాలో మరోసారి సత్తా చాటాలని ఉవ్విళ్లూరుతోంది. బీజేపీతో కటీఫ్ కావడంతో ఈసారి జిల్లాలో ఒంటరిగానే బరిలోకి దిగుతోంది.

చింతమనేనితో చిక్కులు తప్పవా?


అయితే ప్రభుత్వం విప్, దెందులూరు ఎమ్మెల్యే చింతమనేని ప్రభాకర్ వ్యవహారం పార్టీకి తలనొప్పిగా మారింది. గత ఐదేళ్ల నుంచి ఏదొక వివాదంతో ఆయన తరుచూ వార్తల్లో నిలుస్తున్నారు. తహసీల్దార్ వనజాక్షిపై దాడి, హనుమాన్ జంక్షన్‌లో వాహనదారులపై దాడి, దళితులపై అనుచిత వ్యాఖ్యలు, భూ దందాలు… ఇలాంటి వివాదాలతో చింతమనేని పార్టీ ప్రతిష్ఠను దిగజారుస్తున్నారంటూ వ్యాఖ్యలు వినిపిస్తున్నాయి. అయితే ఇన్ని వివాదాల్లో ఇరుకున్నా పార్టీ అధిష్ఠానం మాత్రం ఆయనపై ఎలాంటి చర్యలు తీసుకోకపోవడం గమనార్హం. చింతమనేని ఎన్ని వివాదాల్లో చిక్కుకున్నప్పటికీ తన బలగాన్ని పెంచుకుంటూనే ఉన్నారు. జిల్లా రాజకీయాల్లో చక్రం తిప్పుతున్న చింతమనేని టీడీపీకి మరోసారి ఘనవిజయం కట్టబెట్టాలన్న ఆలోచనతో ఉన్నారు. మరోవైపు ముఖ్యమంత్రి చంద్రబాబు ప్రవేశపెట్టిన సంక్షేమ పథకాలే తమను తిరిగి గెలిపిస్తాయని జిల్లా నేతలు భావిస్తున్నారు. అయితే నాలుగేళ్లపాటు కేంద్రంలో భాగస్వామిగా ఉన్నా ప్రత్యేక హోదా సహా విభజన హామీలు సాధించలేకపోయారన్న భావన ప్రజల్లో ఉండటం టీడీపీకి ప్రతికూలంగా మారే అవకాశం కనిపిస్తోంది.

ఇక ప్రతిపక్ష వైసీపీది మరో విధమైన పరిస్థితి. గత ఎన్నికల్లో ఒక్కస్థానం కూడా గెలుచుకోలేకపోవడంతో ఆ పార్టీ శ్రేణులు నిరాశలో కూరుకుపోయాయి. అయితే పార్టీ అధినేత జగన్ చేపట్టిన పాదయాత్రకు జిల్లాల్లో వచ్చిన అనూహ్య స్పందన నేతల్లో ఉత్సాహం నింపింది. దీంతో జిల్లాలో ఈసారి ఎలాగైనా మెజార్టీ స్థానాలు గెలుచుకుంటామని ధీమాగా ఉన్నారు ఆ పార్టీ నేతలు. దీనికి తోడు ప్రభుత్వ వ్యతిరేకత, టీడీపీ ఎమ్మెల్యేలపై వస్తున్న అవినీతి ఆరోపణలను తమకు అనుకూలంగా మార్చుకునేందుకు వైసీపీ ప్రయత్నిస్తోంది.

మరోవైపు పవన్‌కళ్యాణ్ సారథ్యంలోని జనసేన పార్టీకి జిల్లాలో పెరుగుతున్న ఆదరణ టీడీపీ, వైసీపీ శ్రేణులకు ఆందోళన కలిగిస్తోంది. ఉభయగోదావరి జిల్లాల్లో జనసేన ప్రభావం ఎక్కువగా ఉంటుందని రాజకీయ విశ్లేషకులు సైతం చెబుతుండటంతో ప్రధాన పార్టీలు ఆందోళనలో పడ్డాయి. పవన్ సైతం అధికార, ప్రతిపక్ష పార్టీలపై నేరుగా విమర్శలు చేయడంతో ప్రజలు ఎవరివైపు నిలబడతారన్నది సస్పెన్స్‌గా మారింది. ఇక బీజేపీ, కాంగ్రెస్‌ పార్టీలను ప్రజలు నమ్మే పరిస్థితి లేకపోవడంతో వాటి ప్రభావం నామమాత్రంగానే కనిపిస్తోంది.

2014 ఎన్నికల్లో విజేతల వివరాలు

క్ర.సంఖ్య అసెంబ్లీ నియోజకవర్గం విజేత పార్టీ
54 కొవ్వూరు కె.యస్. జవహర్ తె.దే.పా
55 నిడదవోలు బూరుగుపల్లి శేషారావు తె.దే.పా
56 ఆచంట పితాని సత్యనారాయణ తె.దే.పా
57 పాలకొల్లు నిమ్మల రామానాయుడు తె.దే.పా
58 నర్సాపురం బంగారు మాధవనాయుడు తె.దే.పా
59 భీమవరం పూలపర్తి రామాంజనేయులు తె.దే.పా
60 ఉండి వి.వి శివరామరాజు తె.దే.పా
61 తణుకు ఆరిమిల్లి రాధాకృష్ణ తె.దే.పా
62 తాడేపల్లిగూడెం పైడికొండల మాణిక్యాల రావు బీజేపీ
63 ఉంగుటూరు వీరాంజనేయులు తె.దే.పా
64 దెందులూరు చింతమనేని ప్రభాకర్ తె.దే.పా
65 ఏలూరు బుజ్జి తె.దే.పా
66 గోపాలపురం ముప్పిడి వేంకటేశ్వరరావు తె.దే.పా
67 పోలవరం మొడియం శ్రీనివాసరావు తె.దే.పా
68 చింతలపూడి పీతల సుజాత తె.దే.పా