राजस्थानात गुज्जरांना पाच टक्के आरक्षण

राजस्थानात गुज्जरांना पाच टक्के आरक्षण
वृत्तसंस्था, जयपूर

राजस्थानातील जनजीवन विस्कळीत करणाऱ्या गुज्जर समाजाचे आंदोलन शमवण्यासाठी अखेर राज्य सरकारने तातडीची पावले उचलून या समाजाचा समावेश मागासवर्गीयांमध्ये केला आहे. गुज्जर व चार इतर समाजांना शिक्षण व नोकऱ्यांत एकत्रित पाच टक्के आरक्षण देणारे विधेयक राज्य सरकारने बुधवारी विधानसभेत संमत केले. शासकीय नोकरी व शिक्षणामध्ये आरक्षण मिळण्यासाठी गुज्जर समाजाने गेल्या पाच दिवसांपासून आंदोलनाचे शस्त्र उचलले आहे. यामुळे राज्यातील रस्ते वाहतूक तसेच देशभरातील रेल्वेसेवेला फटका बसला आहे. अखेर गुज्जरांची मागणी मान्य करीत राज्य सरकारने बुधवारी विधानसभेत गुज्जर, बंजारा, गाडिया लोहार, राईका व गडरिया समाजाला एकत्रित ५ टक्के आरक्षण जाहीर केले आहे. याद्वारे राज्यातील मागासवर्गीय आरक्षण २१वरून २६ टक्के झाले आहे. ‘हे पाच समाज सर्वाधिक मागास असून, त्यांना स्वतंत्र आरक्षणाची आवश्यकता आहे’, असे या विधेयकात नमूद करण्यात आले आहे.