YS Sharmila & Prabhas: షర్మిల ఫిర్యాదుపై కేసు నమోదు, ప్రత్యేక దర్యాప్తు బృందం

ys jagan sister ys sharmila lodged a complaint with hyderabad cyber crime; police filed a case

Highlights

  • హైదరాబాద్ పోలీస్ కమిషనర్ అంజనీకుమార్‌‌కు వైఎస్ షర్మిల ఫిర్యాదు
  • ప్రభాస్‌ను తానెప్పుడూ నేరుగా చూడలేదని, కలవలేదన్న వైఎస్ జగన్ సోదరి
  • రాజకీయ ప్రత్యర్థులే ఈ పనులు చేస్తున్నారని షర్మిలా ఆరోపణలు
వైసీపీ అధినేత వైఎస్ జగన్‌మోహన్‌రెడ్డి సోదరి షర్మిల ఫిర్యాదు మేరకు సైబర్ క్రైమ్ పోలీసులు కేసు నమోదు చేశారు. షర్మిల ఆరోపణలు, ఫిర్యాదుపై విచారణ వేగమంతం చేశారు. సెక్షన్ 67 ఐటీ యాక్ట్‌, ఐపీసీ సెక్షన్‌ 509 (మహిళలను కించపరచడం) కింద కేసు నమోదు చేసి దర్యాప్తు ప్రారంభించారు. అడిషనల్ డీసీపీ రఘువీర్ నేతృత్వంలో ప్రత్యేక దర్యాప్తు బృందాన్ని ఏర్పాటుచేశారు. సోషల్‌మీడియాలో తనపై జరుగుతున్న అసత్య ప్రచారంపై చర్యలు తీసుకోవాలని కోరుతూ షర్మిల సోమవారం నాడు (జనవరి 14న) హైదరాబాద్ పోలీస్ కమిషనర్ అంజనీకుమార్‌‌కు ఫిర్యాదు చేసిన విషయం తెలిసిందే.

సినీ హీరో ప్రభాస్‌తో తనకు సంబంధం ఉందని ఆరోపిస్తూ సోషల్ మీడియాలో తనపై అసభ్య వ్యాఖ్యలు చేస్తూ వదంతులు వ్యాప్తి చేస్తున్న వారిపై చట్టపరమైన చర్యలు తీసుకోవాలని షర్మిల ఫిర్యాదు చేశారు. ఈ ప్రచారం వెనుక టీడీపీ ఉందని, ఈ అసత్య ప్రచారం వెనుక చంద్రబాబు కుట్ర ఉందని ఆమె ఆరోపించారు. కానీ ఈ వదంతులను జనసేన కార్యకర్తలు, పవన్ కళ్యాణ్ ఫ్యాన్స్ పేరుతో టీడీపీ సంబంధిత వర్గాలు దుష్ప్రచారం చేస్తున్నాయని ఆమె అనుమానాలు వ్యక్తం చేశారు.

ఫిర్యాదు చేసిన సమయంలో షర్మిల వెంట ఆమె భర్త బ్రదర్ అనిల్ కుమార్, వైసీసీ మాజీ ఎంపీ వైవీ సుబ్బారెడ్డి, సజ్జల రామకృష్ణారెడ్డి, వాసిరెడ్డి పద్మ ఉన్నారు. 2014 ఎన్నికల నేపథ్యంలోనూ హీరో ప్రభాస్‌తో తనకు సంబంధం ఉందని దుష్ప్రచారం చేశారని, ప్రస్తుతం అదే తరహాలో ప్రచారం చేసి తన వ్యక్తిత్వాన్ని దెబ్బతీయాలని తెలుగు తమ్ముళ్లు యత్నిస్తున్నారని ఫిర్యాదులో పేర్కొన్నారు. తెలుగువారి ఆత్మగౌరవమంటూ పెద్ద పెద్ద డైలాగులు చెప్పే పార్టీ వాళ్లు మీ కుటుంబాలు, మీ పార్టీ మహిళలకే ఆత్మగౌరవం ఉండాలా అని ప్రశ్నించారు. చంద్రబాబుగారి ఇంట్లో మహిళలకే ఆత్మగౌరవం పరిమితమై ఉంటుందా, దిగజారుడు రాజకీయాలు ఇకనైనా మానుకోవాలని షర్మిల సూచించారు.