YS Sharmila: ప్రభాస్‌తో నాకెలాంటి సంబంధం లేదు

y s sharmila files police complaint against `online rumours' on personal life

Highlights

  • సినీ హీరో ప్రభాస్‌తో తనకెలాంటి సంబంధం లేదని వైఎస్ షర్మిళ పేర్కొన్నారు.
  • తనపై సోషల్ మీడియాలో తనపై అసత్య ప్రచారం చేస్తున్న వారిపై చర్యలు తీసుకోవాలని హైదరాబాద్ సీపీకి ఫిర్యాదు చేశారు.
  • తనపై జరుగుతున్న ప్రచారంలో తెలుగుదేశం పార్టీ కుట్ర ఉందని అనుమానం వ్యక్తం చేశారు.
సోషల్‌మీడియాలో తనపై జరుగుతున్న అసత్య ప్రచారంపై చర్యలు తీసుకోవాలని కోరుతూ వైసీపీ అధినేత వైఎస్ జగన్ సోదరి షర్మిల ఈరోజు హైదరాబాద్ పోలీస్ కమిషనర్ అంజనీకుమార్‌ ఫిర్యాదు చేశారు. సినీ హీరో ప్రభాస్‌తో తనకు సంబంధం ఉందని ఆరోపిస్తూ జనసేన కార్యకర్తలు, పవన్ కళ్యాణ్ ఫ్యాన్స్ పేరుతో సోషల్ మీడియాలో తనపై అసభ్య వ్యాఖ్యలు చేస్తున్న వారిపై చట్టపరమైన చర్యలు తీసుకోవాలని ఫిర్యాదులో పేర్కొన్నారు. షర్మిళ వెంట ఆమె భర్త బ్రదర్ అనిల్‌కుమార్, వైసీపీ నేతలు వైవీ సుబ్బారెడ్డి, వాసిరెడ్డి పద్మ తదితరులు ఉన్నారు. ఆ తర్వాత షర్మిళ మీడియాతో మాట్లాడుతూ ప్రభాస్ అనే వ్యక్తిని తన జీవితంలో ఎన్నడూ చూడలేదని, కలవలేదని తెలిపారు. ఈ ప్రచారం వెనుక తెలుగుదేశం పార్టీ ఉందని ఆమె అనుమానం వ్యక్తం చేశారు. ఏపీ పోలీసులపై నమ్మకం లేకనే హైదరాబాద్ పోలీసులకు ఫిర్యాదు చేసినట్లు షర్మిళ తెలిపారు.

‘2014 ఎన్నికలకు ముందుకు తనకు సినీ హీరో ప్రభాస్‌తో తనకు సంబంధం ఉందని ఓ వర్గం ప్రచారం చేసింది. దీనిపై అప్పట్లో నేను పోలీసులకు ఫిర్యాదు చేయగా.. కొందరిపై చర్యలు తీసుకున్నారు. ఇప్పుడు ఎన్నికలు వస్తుండటంతో ఆ ప్రచారాన్ని మళ్లీ ప్రారంభించారు. ఇలాంటి రాతలు ఇంకెంతో మంది మహిళలపైనా రాస్తున్నారు. అందుకే వెబ్‌సైట్లు, సోషల్ మీడియాలో ఇలాంటి రాతలకు చరమగీతం పాడేలా ఏకం కావాలని ప్రజాస్వామ్యవాదులు, రాజకీయ నేతలు, విలేకరులు, మహిళా సంఘాలను కోరుతున్నాను. తప్పుడు ప్రచారాలు చేసేవారు, చేయించేవారు కాకుండా నేను దోషిలా నిలబడి నా వాదన వినిపించుకోవాల్సి రావడం మహిళలకే అవమానకరం. అసత్య ప్రచారాలపై నేను స్పందించకపోతే.. అదే నిజమని చాలామంది అనుకునే ఛాన్స్ ఉంది. అందుకే పోలీసులకు ఫిర్యాదు చేయడంతో పాటు.. మీడియా ముందుకు వచ్చాను’

‘భార్యగా, తల్లిగా, చెల్లిగా నా నైతికతను, నిజాయితీని నిరూపించుకోవాల్సిన అవసరం లేదు. కానీ ఈరోజు నా గౌరవాన్ని కాపాడుకోవాల్సి ఉంది కావునే ఇలా బయటకు వచ్చా. ప్రభాస్‌ను నా జీవితంలో ఎప్పుడూ కలవలేదు. మాట్లాడలేదు. మా మధ్య ఎలాంటి సంబంధం లేదని నా పిల్లలపై ప్రమాణం చేసి చెబుతున్నా. ఈ ప్రచారం నా కుటుంబంతో పాటు స్నేహితులు, సన్నిహితులను ఎంతగానో బాధిస్తోంది. ఇలాంటి పుకార్లను పుట్టించేవారికి సిగ్గు అనిపించడం లేదా?. ఈ ప్రచారం వెనుక తెలుగుదేశం పార్టీ హస్తం ఉందని నా అనుమానం. టీడీపీకి పుకార్లు కొత్తేమీ కాదు. వైఎస్ సీఎం కాకముందు ఫ్యాక్షనిస్టు అంటూ ప్రచారం చేశారు. కానీ ఆయన సీఎం అయ్యాక ఎంత మంచి మనిషో ప్రజలకు తెలిసిందే. నా అన్న జగన్ మీద కూడా అలాంటి ప్రచారమే చేశారు. నాపై జరుగుతున్న ప్రచారం కూడా టీడీపీ నేతలు చేస్తున్నదే. ఓ అబద్ధాన్ని వందసార్లు చెప్పి దాన్ని నిజం చేయాలన్నదే ఆ పార్టీ అధినేత చంద్రబాబు పాలసీ. మాకు విలువలు ఉన్నాయి కాబట్టే మేం అలాంటి ప్రచారాలు చేయడం లేదు. చంద్రబాబు డిక్షనరీలో విలువలు అన్న పదమే లేదు. ఆయన రాజకీయాల్లో దిగజారుడుతనాన్ని ఇప్పటికైనా మానుకోవాలని కోరుతున్నా’