Ishant Sharma: ఆసీస్‌పై ఇషాంత్‌ శర్మ అరుదైన రికార్డ్..!

ishant completes 50 test wickets against australia
ఆస్ట్రేలియాతో అడిలైడ్ వేదికగా జరుగుతున్న తొలి టెస్టు మ్యాచ్‌లో భారత్ ఫాస్ట్ బౌలర్ ఇషాంత్ శర్మ అద్వితీయ ప్రదర్శనతో ఆకట్టుకుంటున్నాడు. మ్యాచ్‌లో తాను వేసిన తొలి ఓవర్‌లోనే ఆసీస్ ఓపెనర్ అరోన్ ఫించ్‌ని క్లీన్‌బౌల్డ్ చేసి డకౌట్‌గా పెవిలియన్‌కి పంపిన ఇషాంత్ శర్మ.. ఆ తర్వాత కెప్టెన్ టిమ్‌పైన్‌(5)ని కూడా బోల్తా కొట్టించాడు. మ్యాచ్‌లో ఈ రెండు వికెట్లు తీయడం ద్వారా.. ఆస్ట్రేలియాపై టెస్టుల్లో 50 వికెట్లు పడగొట్టిన తొలి భారత ఫాస్ట్ బౌలర్‌గా రికార్డుల్లో నిలిచాడు.

ఆస్ట్రేలియాపై టెస్టుల్లో అత్యధిక వికెట్ తీసిన బౌలర్ల జాబితాని ఓసారి పరిశీలిస్తే.. దక్షిణాఫ్రికా మాజీ ఆల్‌రౌండర్ కలిస్.. 28 టెస్టుల్లో 50 ఆసీస్ వికెట్లు పడగొట్టగా.. ఇషాంత్ శర్మ కేవలం 23 టెస్టుల్లోనే ఆ ఘనత అందుకోవడం విశేషం. ఆస్ట్రేలియాపైనే కాదు.. ఇంగ్లాండ్‌పైనా ఇషాంత్ శర్మ 50 వికెట్ల మైలురాయిని చేరుకోవడం టెస్టుల్లో అతని నిలకడకి నిదర్శనం.

2007లో దక్షిణాఫ్రికాతో జరిగిన టెస్టు సిరీస్‌తో అంతర్జాతీయ క్రికెట్‌లోకి అరంగేట్రం చేసిన ఇషాంత్ శర్మ.. సుదీర్ఘ కెరీర్‌లో ఇప్పటి వరకు 88 టెస్టులాడి 258 వికెట్లు పడగొట్టాడు. అతని సగటు.. 34.59కాగా.. ఎకానమీ 3.21గా ఉంది.