Ind vs Aus: అడిలైడ్ టెస్టులో రిషబ్ పంత్ స్లెడ్జింగ్..!

rishabh pant sledges struggling aussies from behind the stumps, says 'not everyone is pujara here'
ఆస్ట్రేలియాతో అడిలైడ్ వేదికగా జరుగుతున్న తొలి టెస్టు మ్యాచ్‌లో భారత వికెట్ కీపర్ రిషబ్ స్లెడ్జింగ్‌కి దిగాడు. ఆటలో రెండో రోజైన శుక్రవారం ఆస్ట్రేలియా మిడిలార్డర్ బ్యాట్స్‌మెన్ ఉస్మాన్ ఖవాజా (28: 125 బంతుల్లో 1×4) బ్యాటింగ్ చేస్తుండగా.. వికెట్ల వెనుక నుంచి కవ్వింపు తరహాలో పంత్ మాట్లాడిన మాటలు స్టంప్‌ మైక్‌లో రికార్డయ్యాయి.

ఓవర్‌నైట్ స్కోరు 250/9తో ఈరోజు తొలి ఇన్నింగ్స్‌ని కొనసాగించిన భారత్ జట్టు.. తొలి బంతికే ఆఖరి వికెట్‌ని చేజార్చుకోగా.. అనంతరం ఆస్ట్రేలియా జట్టు మొదటి ఇన్నింగ్స్‌ను ఆరంభించింది. అయితే.. తొలి ఓవర్‌లోనే అరోన్ ఫించ్ (0) డకౌటవగా.. అనంతరం వచ్చిన ఉస్మాన్ ఖవాజా క్రీజులో కుదురుకునేలోపే మరో ఓపెనర్ హారిస్ (26), షాన్ మార్ష్ (2) ఔటైపోయారు.

45 పరుగులు లోపే ఇద్దరు టాప్ ఆర్డర్ బ్యాట్స్‌మెన్స్ ఔటవడంతో.. వికెట్ల పతనానికి ఇక అడ్డుకట్ట వేయాలని నిర్ణయించుకున్న ఉస్మాన్ ఖవాజా.. భారత్ బౌలర్ల సహనాన్ని పరీక్షిస్తూ.. క్రీజులో పాతుకుపోయాడు. ఎంతలా అంటే.. అతను ఆడిన 125 బంతుల్లో సగానికిపైగా డిఫెన్స్‌తోనే సరిపెట్టేశాడు. దీంతో.. అతడ్ని కవ్విస్తూ.. ఏకాగ్రతని దెబ్బతీసే ప్రయత్నంలో భాగంగా రిషబ్ పంత్ తన నోటికి పనిచెప్పాడు. భారత్ జట్టులోనూ నిన్న చతేశ్వర్ పుజారా (123: 246 బంతుల్లో 7×4, 2×6) అతి నెమ్మదిగా ఆడుతూ.. ఆ తర్వాత ఆఖర్లో జోరు పెంచి భారత్ జట్టుకి గౌరవప్రదమైన స్కోరు అందించిన విషయం తెలిసిందే.

పుజారా తరహాలో.. ఉస్మాన్ ఖవాజా కూడా ఆడేందుకు ప్రయత్నిస్తున్నాడని గ్రహించిన రిషబ్ పంత్.. వికెట్ల వెనుక నుంచి.. ‘అందరూ ఇక్కడ పుజారాలు కాలేరు’ అని కవ్వించాడు. దీనికి ఉస్మాన్ ఖవాజా స్పందించలేదు. కానీ.. ఆ తర్వాత కొద్దిసేపటికే అతను అశ్విన్ బౌలింగ్‌లో రిషబ్ పంత్‌కే క్యాచ్ ఇచ్చి ఔటయ్యాడు. ఈరోజు ఆట ముగిసే సమయానికి ఆస్ట్రేలియా 191/7తో నిలిచింది.