Cheteshwar Pujara: ಸಾಧನೆಯಲ್ಲೂ ದ್ರಾವಿಡ್‌ ಹಿಂಬಾಲಿಸಿದ ಪೂಜಾರ

cheteshwar pujara emulates icon rahul dravids feat reaching 5000 test runs

Cheteshwar Pujara: ಸಾಧನೆಯಲ್ಲೂ ದ್ರಾವಿಡ್‌ ಹಿಂಬಾಲಿಸಿದ ಪೂಜಾರ
ಆಡಿಲೇಡ್: ಕೆರಿಯರ್ ಆರಂಭದಿಂದಲೇ ‘ದಿ ವಾಲ್’ ಖ್ಯಾತಿಯ ರಾಹುಲ್ ದ್ರಾವಿಡ್ ಅವರೊಂದಿಗೆ ಭರವಸೆಯ ಚೇತೇಶ್ವರ ಪೂಜಾರ ಅವರನ್ನು ಹೋಲಿಸಲಾಗುತ್ತಿದೆ. 2012ರಲ್ಲಿ ದ್ರಾವಿಡ್ ನಿವೃತ್ತಿಯ ಬಳಿಕ ಮೂರನೇ ಕ್ರಮಾಂಕವನ್ನು ಪೂಜಾರ ಸಮರ್ಥವಾಗಿ ತುಂಬಿಕೊಂಡಿದ್ದರು.

ಇದೀಗ ತಮ್ಮ ವೃತ್ತಿ ಜೀವನದ ಸಾಧನೆಯಲ್ಲೂ ದ್ರಾವಿಡ್ ಹಿಂಬಾಲಿಸಿರುವ 30ರ ಹರೆಯದ ಪೂಜಾರ ಅನೇಕ ದಾಖಲೆಗಳನ್ನು ಸರಿಗಟ್ಟಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧ ನಡೆಯುತ್ತಿರುವ ಪ್ರಥಮ ಟೆಸ್ಟ್ ಪಂದ್ಯದ ಮೊದಲ ದಿನದಲ್ಲೇ ಶತಕ ಬಾರಿಸಿರುವ ಪೂಜಾರ 16ನೇ ಟೆಸ್ಟ್ ಶತಕ ಸಾಧನೆ ಮಾಡಿದ್ದರು. ಇದು ಆಸೀಸ್ ವಿರುದ್ಧ ಮೂರನೇ ಹಾಗೂ ಕಾಂಗರೂ ನೆಲದಲ್ಲಿ ಬಾರಿಸಿದ ಚೊಚ್ಚಲ ಶತಕವೂ ಹೌದು. ಪೂಜಾರ 108ನೇ ಇನ್ನಿಂಗ್ಸ್‌ನಲ್ಲಿ 5000 ರನ್ ಸಾಧನೆ ಮಾಡಿದ್ದರು.

ಈ ಮೂಲಕ ರಾಹುಲ್ ದ್ರಾವಿಡ್ ದಾಖಲೆಯನ್ನು ಸರಿಗಟ್ಟಿರುವ ಪೂಜಾರ, ಟೆಸ್ಟ್ ಕ್ರಿಕೆಟ್‌ನಲ್ಲಿ 5000 ರನ್ ಪೂರ್ಣಗೊಳಿಸಿದ ಟೀಮ್ ಇಂಡಿಯಾದ ಐದನೇ ಅತಿ ವೇಗದ ಬ್ಯಾಟ್ಸ್‌ಮನ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದಾರೆ. ಇಲ್ಲಿ ಕುತೂಹಲದಾಯಕ ಸಂಗತಿಯೆಂದರೆ ದ್ರಾವಿಡ್ ಅವರಿಗೆ ಸಮಾನವಾಗಿ ಈ ಹಿಂದೆ 67 ಇನ್ನಿಂಗ್ಸ್‌ಗಳಲ್ಲಿ 3000 ಹಾಗೂ 84 ಇನ್ನಿಂಗ್ಸ್‌ಗಳಲ್ಲಿ 4000 ರನ್ ಸಾಧನೆಯನ್ನು ಮಾಡಿದ್ದರು.

ಹೀಗೆ ಅಂಕಿಅಂಶದಲ್ಲೂ ದ್ರಾವಿಡ್‌ಗೆ ಸರಿಸಮಾನವಾಗಿ ನಿಂತಿದ್ದಾರೆ. ಅಂತಿಮವಾಗಿ 246 ಎಸೆತಗಳಲ್ಲಿ ಏಳು ಬೌಂಡರಿ ಹಾಗೂ ಎರಡು ಸಿಕ್ಸರ್ ನೆರವಿನಿಂದ 123 ರನ್ ಗಳಿಸಿ ರನೌಟ್ ಆಗಿದ್ದರು.

ಟೆಸ್ಟ್ ಕ್ರಿಕೆಟ್‌ನಲ್ಲಿ ಎಂಟನೇ ಬಾರಿಗೆ ಪೂಜಾರ ರನೌಟ್‌ಗೆ ಬಲಿಯಾಗಿದ್ದಾರೆ. ಈ ಪಟ್ಟಿಯಲ್ಲಿ ಮಾಜಿಗಳಾದ ರಾಹುಲ್ ದ್ರಾವಿಡ್ 13 ಹಾಗೂ ಸಚಿನ್ ತೆಂಡೂಲ್ಕರ್ ಒಂಬತ್ತು ಬಾರಿ ರನೌಟ್ ಆಗಿದ್ದರು.