మిచెల్ స్టార్క్ ఔట్.. స్టెప్‌లేసిన విరాట్ కోహ్లీ

india vs australia 1st test: virat kohli funny dance in adelaide oval stadium
అడిలైడ్ వేదికగా ఆస్ట్రేలియాతో జరుగుతున్న తొలి టెస్టు మ్యాచ్‌లో భారత్ కెప్టెన్ విరాట్ కోహ్లీ తెగ ఉత్సాహంగా కనిపిస్తున్నాడు. భారీ అంచనాల మధ్య తొలి ఇన్నింగ్స్‌లో క్రీజులోకి అడుగుపెట్టిన విరాట్ కోహ్లి (3: 16 బంతుల్లో) బ్యాట్‌తో విఫలమైనా.. మైదానంలో మాత్రం తనదైన వ్యూహాలతో టీమ్‌లో ఆత్మస్థైర్యాన్ని నింపుతున్నాడు. ఈ మ్యాచ్‌లో తొలుత బ్యాటింగ్ చేసిన భారత్ జట్టు 250 పరుగులకి మొదటి ఇన్నింగ్స్‌లో ఆలౌటవగా.. ఆస్ట్రేలియా జట్టు 235కే కుప్పకూలిపోయింది. దీంతో.. భారత్‌కి 15 పరుగుల తొలి ఇన్నింగ్స్ ఆధిక్యం లభించింది.

ఓవర్‌నైట్ స్కోరు 191/7తో ఆటలో మూడో రోజైన శనివారం తొలి ఇన్నింగ్స్‌ను కొనసాగించిన ఆస్ట్రేలియా జట్టు 204 పరుగుల వద్దే మిచెల్ స్టార్క్ (15: 34 బంతుల్లో 1×4) రూపంలో 8వ వికెట్ కోల్పోయింది. దీంతో.. కాసేపు మైదానంలో విరాట్ కోహ్లీ తెగ ఉత్సాహంగా కనిపించాడు. పాటలు పాడుతూ.. స్టెప్‌లు వేసి మరీ అభిమానుల్ని అలరించాడు. బౌలింగ్ సమయంలో.. భారత్‌‌ని అతిగా కవ్వించిన మిచెల్ స్టార్క్ ఔటవడంతో పాటు.. మ్యాచ్‌పై పట్టు చిక్కుతుండటంతో కోహ్లీ అలా సరదాగా చేసినట్లు తెలుస్తోంది.